Adoleshentët në Evropë pinë më shumë alkool se të rriturit

(KESTONE/Christof Schuerpf)

Shkalla e alkoolistëve të rëndë në mesin e adoleshentëve – ata të moshës 15-16 vjeç – është dukshëm më e lartë se te të rriturit në shumicën e vendeve evropiane. Duke qenë se pirja e hershme lidhet me pirjen e mëvonshme në jetë, kjo paraqet një problem serioz të shëndetit publik në kontinent, shkruan Euronews.

Në vitin 2019, mesatarisht, më shumë se një e treta (37.4 për qind) e adoleshentëve në BE raportuan të paktën një pirje të tepruar në 30 ditët e fundit, ndërsa kjo normë ishte më e ulët (18.7 për qind) tek të rriturit. Prandaj, numri i adoleshentëve që pinin në mënyrë të tepruar ishte dy herë më i lartë se ai i të rriturve.

Pirja e tepërt në mesin e adoleshentëve, e përcaktuar si pirja e pesë ose më shumë pijeve në një rast, varionte nga 8 për qind në Islandë në 59 për qind në Danimarkë në vitin 2019.

Katër vende nordike – Islanda, Norvegjia, Suedia dhe Finlanda – shënuan normat më të ulëta të pirjes së rëndë të alkoolit në mesin e 15-16-vjeçarëve. Megjithatë, një vend tjetër nordik, Danimarka, kishte shkallën më të lartë të pirësve të rëndë.

Kjo mund të lidhet me ligjet dhe rregulloret. Në Danimarkë adoleshentët kanë akses në alkool më herët se ata në vendet e tjera nordike dhe politikat e kontrollit të alkoolit janë gjithashtu më pak strikte, sipas raportit të OECD “Shëndeti në ciklin e BE-së, 2022”.

Mosha ligjore për të blerë birrë dhe verë në Danimarkë është më e ulët, 16 në krahasim me 18 vjeç, megjithëse tani ka plane për të kufizuar shitjen e pijeve që përmbajnë më shumë se 6 për qind alkool tek 16-18-vjeçarët.

Shkalla e pirjes së tepërt ishte nën 25 për qind në vetëm pesë vende, katër Nordikët dhe Portugalinë.

Përveç Danimarkës, në listë janë edhe katër vende të tjera me mbi 45 për qind. Ato janë Gjermania, Austria, Sllovakia dhe Kroacia.

Adoleshentët në Francë dhe Spanjë (të dyja 34 për qind) dhe Itali (35 për qind) kishin norma më të ulëta të pirjes së tepërt se sa mesatarja e BE-së.