Aeroporti i Prishtinës sjell fluturime shtesë nga Frankfurti dhe Viena

Nga nesër Eurowings fillon me destinacionin e Frankfurtit për të vazhduar me Wizz air në destinacionin e Vienës.

Një sezonë dimërore e suksesshme sapo ka filluar në ANP ‘Adem Jashari’, duke sjellë fluturime shtesë për dy qytetet e mëdha, siç janë Frankfurti dhe Viena, njofton faqja zyrtare e aeroportit “Adem Jashari”, përcjell albinfo.ch.

Nga data 17 dhjetor 2019 kompania ajrore Eurowings fillon fluturimet për dhe nga Frankfurti dy herë në javë gjatë sezonës dimërore 2019 për të vazhduar më tej me fluturime tri herë në javë gjatë vitit 2020.

Ndërkaq, vetëm një ditë më vonë, më 18 dhjetor 2019, kompania low cost Wizz air do të fillojë me fluturime për në destinacionin e Vienës. Kjo kompani do të fillojë fluturimet tri herë në javë gjatë sezonës së vitit 2019, ndërkaq katër herë në javë në vitin që vjen.