Afaristët shqiptaro-amerikanë kanë projekte konkrete për investime

Ministrat Gashi dhe Majko me ta kanë diskutuar për projekte dhe kërkesa konkrete që lidhen ngushtë me zhvillimin ekonomik të Kosovës dhe të Shqipërisë

Dy ministrat e Diasporës, Pandeli Majko e Dardan Gashi gjatë qëndrimit në SHBA kanë takuar edhe disa nga afaristët më të suksesshëm shqiptarë, të cilët jetojnë dhe veprojnë në qytetin e Nju-Jorkut.

Në njoftimin për media thuhet se me ta kanë diskutuar për projekte dhe kërkesa konkrete që lidhen ngushtë me zhvillimin ekonomik të Kosovës dhe të Shqipërisë. Kosova e Shqipëria kanë shumë produkte me cilësi të lartë, të cilat eksportohen, mirëpo ajo që mungon është promovimi i tyre i mirëfilltë, u tha në këtë takim. Në mesin e afaristëve i pranishëm ishte edhe asamblisti i vetëm shqiptar i Asamblesë së qytetit të Nju-Jorkut, Mark Gjonaj.

“Kosova është duke e përmirësuar në masë të madhe klimën e përgjithshme për investime. Lajm i mirë është nënshkrimi i kontratës për ndërtimin e termocentralit të ri, në vlerë  1.2 miliardë dollarë, nga kompania amerikane, që tregon qartë për mundësitë dhe sigurinë e investimeve strategjike nga kompani serioze në Kosovë”, tha ministri Gashi.

Në këtë takim, po ashtu, u dakordua në parim një vizitë e afaristëve nga ShBA-të në Kosovë.

Ministri Gashi dhe ministri Majko takuan edhe rrjetin e profesionistëve shqiptarë në Ner-York “APEN”, me të cilët diskutuan për organizimin e rrjeteve të profesionistëve dhe të  studentëve në Amerikë, shkëmbimin e përvojave dhe sjelljen e ekspertizës në Kosovë dhe Shqipëri.