Agim Ademi për “Blick”: Avdullahu mund të bëhet Xhaka i Kosovës

Kryetari i Federatës së Futbollit të Kosovës, Agim Ademi, ka folur për gazetën zvicerane Blick, ku ka trajtuar raportet mes Kosovës dhe Zvicrës, si dhe të ardhmen e lojtarëve të rinj shqiptarë, transmeton albinfo.ch.

Ademi ka theksuar se mes dy federatave nuk ka asnjë konflikt dhe se Kosova e respekton çdo vendim të futbollistëve për zgjedhjen e kombëtares, ashtu siç ndodhi me Xhakën, Shaqirin apo së fundi Ardon Jasharin.

Duke folur për Leon Avdullahun, ai u shpreh se ai ka vendosur me zemër për Kosovën dhe mund të bëhet lider i gjeneratës së re. “E shohim si Granit Xhakën e Kosovës. Është i ri, por shumë i mençur dhe me potencial të madh,” u shpreh Ademi.

Ai nënvizoi se FFK-ja po punon për ndërtimin e ekipit përfaqësues të së ardhmes dhe se Kosova mbetet gjithmonë e hapur për të gjithë lojtarët që duan të përfaqësojnë vendin e prindërve të tyre.