Aklamacioni dhe diskrecioni nuk janë të këmbyeshme*

Këmbimi i aklamacionit me diskrecionin nga jo vetëm kryetari i njërës prej partive kryesore, por edhe nga kryeministri aktual i vendit rrezikon seriozisht shndërrimin e demokracisë në autarki

Rizgjedhja e kryetarit të LDK-së me aklamacion (ngritje dore) disa javë pasi që kryetari i Vetëvedosjes ishte tërhequr dhe kishte emëruar pasuesin e tij në diskrecion (fshehtësi) lënë për të konkluduar se aklamacioni dhe diskrecioni po na promovohen si dy faktorë kryesorë të demokracibërjes tek ne.
Këmbimi i aklamacionit me diskrecionin nga jo vetëm kryetari i njërës prej partive kryesore, por edhe nga kryeministri aktual i vendit rrezikon seriozisht shndërrimin e demokracisë në autarki.
Keqpërdorimi i diskrecionit për të promovuar unisonin dhe anashkalaimi i aklamacionit për të pamundësuar disonacën nga vetë oponuesi i kryesor i politikës sonë zyrtare po e ngulfasin shpresën dhe po e shtojnë obsesionin.
Aklamacioni – diskrecion dhe diskrecioni – aklamacion, si dy da barazimet më të pabarabarta që ka imponuar atrofia jonë qytetare, do të vazhdojnë të implikojnë sa uniformitet e konformizëm, aq edhe jokreativitet e servilizëm.
Për të shtuar jetëgjatësinë e tyre diabolike, liderët anemikë sanksionojnë me aklamacion epshin e tyre pushtetor me statute që u garantojnë pushtet të amshueshëm e anabolik. Për të siguruar sundimin pa kundërshtim dhe për ta shpallur kundërshtimin sakrilegj, ata inkuzicionojnë e përjashtojnë me a pa diskrecion , siç edhe do të linçonin pa shenjë e gjurmë po të mos mbikëqyreshin dhe po të mos penalizoheshin
Liria jonë po rrezikohet ditëpërditë, ceremonialisht, para syve tanë nga ata që duhet të jenë garantuesit e saj dhe ne po flasim sikur të flisnim për një civilizim të një galaksie tjetër, ku udhëtimi është sa i pamundur për shkaqe teknike, aq edhe i pakuptimtë për shkaqe kohore.
Kurajoja jonë qytetare po sfidohet e pozita jonë shoqërore po rrëgjohet nga liderët e kameleonët e tyre, e ne po vazhdojmë heshtim me zell si të ishim mumje të balsamosura.
Liderët po e shtrijnë pushtetin e tyre faranoik me aklamacion e ne po vazhdojmë të heshtim në diskrecion si të ishim në grevë të amshueshme fjale e veprimi.
Dhe kështu do te vazhdojë përderisa aklamacioni të këmbehet me diskrecionin dhe diskrecioni me aklamacion, përderisa a-ja të bëhet d dhe d-ja të bëhet a, përderisa delja të bëhet dash e dashi të bëhet dele.

*Ky është një opinion i autorit dhe nuk përputeht domosdoshmërisht me qëndrimin e redaksisë.