Aksion bastisjeje ndaj “Tigrave Tamilë” në Zvicër

Një bastisje e përmasave të gjera, që ka përfshirë shumë kantone të Zvicrës, është bërë të martën, në përpjekje për të zbuluar dhe ndaluar veprimtarinë e “Tigrave tamilë”, me ç`rast janë arrestuar dhjetë persona të dyshimtë.

Aksionin e ka organizuar Policia Federale në bashkëpunim me policitë e kantoneve, njofton Prokuroria Federale.

Të arrestuarit ngarkohen për larje parash dhe për përkatësinë në një organizatë kriminale, e cila, sipas prokurorisë, ka ushtruar presion dhe ka bërë shantazh ndaj tamilëve që jetojnë në Zvicër, për të mbështetur financiarisht “Tigrat tamilë”.

Me mjetet e siguruara kështu, ata thuhet të kenë financuar blerjen e armatimit në Sri Lanka, njofton nzz.ch.

Organizata e tigrave tamilë në vendet e Bashkimit Evropian konsiderohet si organizatë terroriste, ndërsa në Zvicër nuk është ndaluar asnjëherë veprimtaria e saj.