Alarm për verën e nxehtë në Kosovë

Sivjet do të jetë vera më e nxehtë në dy dekadat e fundit, japin detaje nga IHMK

Në një prononcim për media, Besim Aliu nga Instituti Hidrometeorologjik i Kosovës, ka thënë se temperaturat e regjistruara në muajin qershor të këtij viti janë shumë më të larta që nga viti 2001.

Sipas tij, temperaturat e muajit të kaluar kanë arritur deri në 35.6, e që sipas tij, temperatura si këto në vitet e kaluara kanë mbretëruar në muajt korrik dhe gusht.

Po ashtu, Aliu tha se nga datat 20 deri 30 qershor temperaturat kanë arritur mbi 30 gradë celsius.

Parashikuesi i motit nga IHMK përmes një grafike të prezantuar njëherësh ka shpjeguar se edhe deri në sa gradë kanë arritur temperaturat në muajin qershor që rezulton se ishte më i nxehti.

Ndërkaq sa u përket reshjeve në vend gjatë këtyre muajve, Aliu ka treguar se në maj nuk ka pasur fare reshje, ndërsa Podujeva dhe  Prizreni janë qytetet që kanë regjistruar më së shumti reshje në qershor, kurse gjatë kësaj periudhe më pak shi pati në Junik.

Në fund, parashikuesi i motit u ka bërë thirrje qytetarëve që nga ora 10:00 e mëngjesit deri në orën 17:00 pasdite të mos ekspozohen në temperaturat e larta.

---