Alarmohet Kombëtarja kuqezi

Shumë lojtarë janë të lënduar, pa skuadër ose që nuk aktivizohen në skuadrat e tyre respektive

Shqipëria në muajin shtator do të zhvillojë dy ndeshje shumë të rëndësishme, kundër Skocisë dhe Izraelit.

Por, trajneri Christian Panucci është në telashe të mëdha, pasi shumë lojtarë janë të lënduar, pa skuadër ose që nuk aktivizohen, shkruan albinfo.ch.

Së fundi është Odise Roshi, i cili ka këputur ligamentet dhe do të mungojë për një kohë të gjatë.

Roshi i shtohet listës së të lënduarve. Armando Sadiku gjithashtu kishte këputur ligamentet dhe do të qëndrojë për një kohë të gjatë jashtë fushës.

Taulant Xhaka është rikthyer të luajë për Kupë, por kjo nuk vlen për Armir Abrashin, që vazhdon të jetë i lënduar, derisa duke u rikuperuar është Eros Grezda.

Në mbrojtje, lajmi i vetëm i mirë është rikthimi i Berat Gjimshitit titullar tek Atalanta, derisa Mërgim Mavraj dhe Arlind Ajeti janë pa ekip.

Naser Aliji, Ivan Balliu, Memolla e Liridon Latifi gjithashtu kanë probleme me skuadrat e tyre, ndaj Panucci do të ketë shumë vështirë në Ligën e Kombeve.