Ambasada e Britanisë u bën thirrje kosovarëve të vaksinohen

Ambasada e Britanisë në Kosovë ka shpërndarë një postim të Ministrisë së Shëndetësisë, ku bëhen të ditura detaje për procesin e vaksinimit në vend.

Me këtë rast, ambasada e ka pasur edhe një thirrje për qytetarët që të vaksinohen.

Në postimin që e ka bërë ditë më parë MSH-ja thuhet se mbi 700 profesionistë shëndetësorë dhe nëpunës të institucioneve shëndetësore publike janë vaksinuar atë ditë me vaksinën AstraZeneca kundër COVID-19.

“Fushata për vaksinimin e profesionistëve shëndetësorë do të vazhdojë me intensitet më të shtuar edhe gjatë ditëve në vijim.  Ekipet shëndetësore të vaksinimit nga komuna të ndryshme të Kosovës po kryejnë punë të mrekullueshme dhe me profesionalizëm, ndërsa ata po mbështeten nga Komiteti për vaksinim kundër COVID-19, ekipi menaxhues i Qendrës së vaksinimit në “1 Tetori”, UNICEF-i dhe vullnetarët e palodhshëm”, thuhet në postimin e MSH-së.