Ambasada gjermane nuk ka informata për përshkallëzim ushtarak në Kosovë

Ambasada Gjermane

Ambasada e Gjermanisë në Kosovë ka deklaruar se nuk ka asnjë informacion që tregon për ndonjë përshkallëzim të mundshëm ushtarak mes Kosovës dhe Serbisë. Këtë e bëri të ditur për Radion Evropa e Lirë, pasi u pyet nëse ekziston ndonjë kërcënim i fundit.

Kjo deklaratë vjen pas komenteve të presidentes së Kosovës, Vjosa Osmani, e cila tha se ish-presidenti amerikan, Donald Trump, kishte parandaluar një konflikt të mundshëm të Serbisë ndaj Kosovës. Osmani theksoi se bëhet fjalë për “zhvillime shumë të vona”, transmeton albinfo.ch.

Deklaratat e saj u kundërshtuan nga i dërguari i Trumpit për misione speciale, Richard Grenell, i cili e akuzoi Osmanin për manipulim të fjalëve të ish-presidentit amerikan. Grenell kujtoi se Trump ishte nominuar për Çmimin Nobel për Paqe për Marrëveshjen e Uashingtonit në vitet 2019-2020, duke shtuar se Osmani nuk kishte qenë pjesë e asaj marrëveshjeje dhe se “pretendimi për ndonjë zhvillim të ri është absurd”.

Nga ana tjetër, Shtëpia e Bardhë nuk ka dhënë ende ndonjë koment lidhur me këtë çështje, pavarësisht kërkesës së Radios Evropa e Lirë për sqarime.