Ambasadori hungarez: Asnjë vend i BE-së nuk jep azil për kosovarët

Hoxha dhe Markusz u pajtuan që të përcjellin mesazhin te qytetarët e Kosovës që mos të bien pre e grupeve të ndryshme të krimit të organizuar, të cilët merren me trafikimin e qenieve njerëzore

“Kosova vlerësohet si vend i sigurt i origjinës dhe se asnjë nga vendet e BE-së nuk japin azil për shtetasit e Kosovës”, kështu citohet të ketë thënë ambasadori i Hungarisë në Prishtinë, Laszlo Markusz gjatë një takimi që ai ka zhvilluar me Zëvendësministrin në detyrë të Punëve të Brendshme, Valdet Hoxha, transmeton albinfo.ch. 

Në takim thuhet të jetë biseduar edhe për situatën aktuale, me theks të veçantë për lëvizjet migruese dhe mundësinë e keqpërdorimit dhe keqinformimit të qytetarëve, siç thuhet, nga grupet e ndryshme të krimit të organizuar.

Hoxha dhe Markusz u pajtuan që të përcjellin mesazhin te qytetarët e Kosovës që mos të bien pre e grupeve të ndryshme të krimit të organizuar, të cilët merren me trafikimin e qenieve njerëzore, pasi që pa vizë valide nuk mund të kalohet kufiri i Hungarisë dhe se kodi penal i Hungarisë parasheh dënime të ashpra për kalime ilegale të kufirit.