Ambasadori i karrierës, Sami Ukelli, largohet nga MPJD-ja

Ambasadori i karrierës, Sami Ukelli, largohet nga MPJD-ja: Zhvillimet në këtë institucion s'janë në përputhje me standardet profesionale

Raportohet se ambasadori i karrierës, Sami Ukelli, ka dhënë dorëheqje nga Ministria e Punëve të Jashtme dhe Diasporës. Arsyet e kësaj dorëheqje kanë të bëjnë me zhvillimet që kanë ndodhur gjatë dy viteve të fundit në dikasterin që udhëhiqet nga Donika Gërvalla, përcjell albinfo.ch.

Në një letër dorëheqje, ambasadori Ukelli ka treguar pse po largohet nga shërbimi diplomatik i Kosovës.

Katër herë ambasadori i Kosovës ka bërë me dije se zhvillimet në dy vitet e fundit në MPJD nuk kanë qenë në përputhje me parimet e profesionalizmit.

Sipas tij, këto zhvillime kanë krijuar një realitet të papajtueshme me standardet që ai ka mbrojtur dhe përfaqësuar në karrierën e tij.

“Me gjithë përkushtimin tim të palëkundur, zhvillimet sidomos në dy vitet e fundit në institucion kanë krijuar një ambient që, në bindjen time të thellë, nuk është më në përputhje as me parimet e profesionalizmit e as integritetit dhe meritokracisë. Këto zhvillime përbëjnë një realitet të papajtueshme me standardet që unë kam mbrojtur e përfaqësuar. Në këto rrethana, e konsideroj të ndershme dhe të nevojshme të tërhiqen nga institucioni”, është thënë në letrën e dorëheqjes.

Në letrën e tij drejtuar sekretarit të Përgjithshëm të MPJD-së, Ilir Muçaj, Ukelli ai ka bërë me dije se dorëheqja e tij ka efekt të mendjeshume.

“Gjatë gjithë karrierës sime në shërbimin diplomatik dhe institucional si gjenerata e parë e ambasadorëve të karrierës  përfshirë katër emërime si ambasador dhe detyrën si Drejtor i parë i Përgjithshëm në Ministri  kam qenë thellësisht i përkushtuar ndaj përfaqësimit dinjitoz të Shtetit, forcimit të pozitës ndërkombëtare të vendit dhe ngritjen e kapaciteteve të Ministrisë”, është thënë në letrën që është dorëzuar në MPJD më 17 qershor.

Ndër të tjera, ambasadori Ukelli ka treguar për vlerësimet ndërkombëtare që ka pasur për karrierën e tij diplomatike.

“Gjatë kësaj periudhe, përveç tjerash kam pasur nderin të kontribuoj në arritjen e njohjeve shtetërore nga vende të rajonit të Paqësorit, në nënshkrimin e marrëveshjes për hapjen e zyrave ndërlidhëse në dialogun Kosovë-Serbi, si dhe të jem dekoruar me urdhrin më të lartë që jepet nga Presidenti i Republikës së Austrisë për kontributin tim në ngritjen dhe forcimin e raporteve bilaterale. Punë ime është vlerësuar gjithashtu nga komuniteti ndërkombëtar, diaspora shqiptare dhe stafi me të cilin kam bashkëpunuar, të cilëve u jam mirënjohës për besimin dhe mbështetjen e vazhdueshme”, thuhet në letrën e dorëheqjes.

Ukelli ka qenë prej ambasadorëve të parë të karrierës të Republikës së Kosovës.

Nga shpallja e pavarësisë, ai ka qenë katër herë ambasador i Republikës së Kosovës në vende të ndryshme të botes.

Deri me tani, ai ka qenë ambasador i Kosovës në Bern të Zvicrës.

Gjatë viteve 2015-2020 Ukelli ka qenë ambasador i Kosovës në Vjenë të Austrisë, në vitet 2013-2015 ka qenë ambasador i Kosovës në Budapest të Hungarisë, kurse nga viti 2010 deri në vitin 2012 ai ka qenë ambasador i Kosovës në Tokio të Japonisë.

Largimi i ambasadorit Ukelli i konfirmon shqetësimet e Shoqatës Sindikale e Anëtarëve të Shërbimit të Jashtëm për degradimin e stafit diplomatik që kanë ndodhur prej ardhjes së Donika Gërvallës në krye të këtij dikasteri.

Kjo sindikatë vazhdimisht ka shpërfaqur shkeljet e rënda në MPJD dhe avancimet politike në shërbimin diplomatik të Kosovës, duke u injoruar profesionistët e diplomatët e karrierës.

---