Tiranë: Ambasadorja gjermane takohet me opozitën

Ambasadorja e Gjermanisë në Tiranë, Susane Schutz dhe ambasadori i BE-së, Luigi Soreca, takuan Lulzim Bashën sot në selinë e kaltër.

Fillimisht Basha ka pritur në takim ambasadoren gjermane dhe më pas edhe ambasadorin e BE-së në Tiranë. Takimi mes liderëve vjen pas vendimit për djegien e mandateve nga opozita, raportojnë mediat shqiptare.

Detaje nga takimet nuk janë bërë me dije, por qëndrimi i ndërkombëtarëve është i qartë, kundër këtij veprimi radikal të opozitës.

Sot në orën 17:00 PD ka thirrur Këshillin Kombëtar, i cili do të jetë organi përfundimtar që do të vendosë për lënien ose jo të mandateve.

Ditën e djeshme PD mblodhi Kryesinë, e cila zgjati rreth 2 orë. Pas mbledhjes së kryesisë, Basha foli për mediat, ku njoftoi se Kryesia ka vendosur djegien e mandateve, përcjell albinfo.ch.

Basha shtoi se djegia e mandateve nuk është një qëllim në vetvete, por fillimi i një sfide, e cila synon të garantojë një qeveri për njerëzit, e jo për krimin.

Pas takimit që zhvilloi me Lulzim Bashën në selinë e PD-së, ambasadorja gjermane, Susanne Schütz, ka nisur një takim me kryetaren e LSI-se, Monika Kryemadhi.

Mësohet se takimi po zhvillohet në selinë e LSI-së dhe vjen pas vendimit për djegien e mandateve nga opozita.