Amnesty International: S’ka bashkëpunim për të pagjeturit e Kosovës

AI kujton se as në Serbi, as në Kosovë nuk janë gjetur varre të reja masive në vitin 2016, ndërsa thekson se marrëveshjet për bashkëpunim midis dy palëve nuk janë zbatuar

Amnesty International ka përmendur mungesën e bashkëpunimit ndërmjet Kosovës dhe Serbisë për realizmin e marrëveshjeve të arritura në Bruksel, ndërsa ka ritheksuar mungesën bashkëpunimit për gjetjen e 1600 personave që akoma figurojnë si të zhdukur. AI këto deklarata i ka dhënë në raportin vjetor të titulluar “Gjendja e të Drejtave të Njeriut në Botë”

Ajo kujton se as në Serbi, as në Kosovë nuk janë gjetur varre të reja masive në vitin 2016, ndërsa thekson se marrëveshjet për bashkëpunim midis dy palëve nuk janë zbatuar.

“Komunitetet rom, ashkali dhe egjiptian kanë vazhduar të vuajnë nga diskriminimi institucional, veçanërisht në qasjen e zgjidhjeve të qëndrueshme për banim dhe punësim”, thuhet në raport.

Në pjesën për Kosovën, Amnesty International po ashtu thotë se Zyra e Prokurorit Special të Kosovës, në vitin 2016, ka qenë me staf të pamjaftueshëm, ndërsa përmend edhe formimin e Dhomave Speciale në Hagë për ndjekjen penale të ish-anëtarëve të Ushtrisë Çlirimtare të Kosovës.

“Përparimi në dialogun midis Kosovës dhe Serbisë, të ndërmjetësuar nga Bashkimi Evropian, ka mbetur i kufizuar”, thuhet në raport.

Duke u ndalur tek aspekti global, sekretari i përgjithshëm i Amnesty International, Salil Shetty, tha se trendi i politikave përçarëse është ilustruar me “retorikën helmuese të fushatës” së Donald Trumpit, tani president i SHBA-së.

Shetty tha se edhe liderët tjerë politikë, në pjesë të ndryshme të botës, kanë përhapur frikë dhe ndarje.

Shetty përmendi Trumpin, presidentin e Turqisë, Recep Tayyip Erdogan, kryeministrin e Hungarisë, Viktor Orban, dhe presidentin e Filipineve, Rodrigo Duterte, në mesin e politikanëve që e konsiderojnë veten “anti-establishment” dhe përdorin “agjendë toksike, e cila ndjek, viktimizon dhe çnjerëzon grupe të tëra njerëzish”.

Raporti i Amnesty International thotë se retorika politike në SHBA dhe Evropë “ne kundër tyre” është nxitur nga kriza globale me refugjatë.

Raporti thotë se në arenën ndërkombëtare, “retorika e urrejtjes” ka arritur nivelin më të keq në politikë qysh në vitet 1930 dhe se po nxit “një zmbrapsje globale kundër të drejtave të njeriut”, citon REL.

Amnesty International parasheh që në vitin 2017 të ketë “kriza të vazhdueshme”.

Sekretari i përgjithshëm i organizatës, Salil Shetty, tha se “2017-ta ka nevojë për heronj të të drejtave të njeriut” për të luftuar retorikën e urrejtjes, e cila ka nxjerrë “anën e errët të natyrës njerëzore” dhe ndikon gjithnjë politikat qeveritare.

“Në vitin 2016, qeveritë kanë mbyllur njërin sy ndaj krimeve të luftës, kanë bërë marrëveshje që dëmtojnë të drejtën për të kërkuar azil, kanë kaluar ligje që shkelin shprehjen e lirë, kanë justifikuar torturën dhe mbikëqyrjen masive dhe kanë zgjeruar pushtetin e policisë”, tha Shetty.

Raporti i Amnesty International përfshin një studim të 159 shteteve dhe territoreve, në përpjekje për të treguar se si njerëzit vuajnë nga konflikti, zhvendosja, diskriminimi ose shtypja.

---