“Ansa”: Vizitoni Shqipërinë në muajin shtator

Ndër të tjera, agjencia shtetërore e lajmeve në Itali sqaron se, në Shqipëri ke mundësi të zgjedhësh, duke filluar që nga plazhi, nga Velipoja në Ksamil ka tipologji të ndryshme

Agjencia shtetërore e lajmeve në Itali, “Ansa”, i këshillon italianëve që të vizitojnë Shqipërinë, duke e klasifikuar Shqipërinë si një ndër pesë destinacionet më të mira globale për t`u vizituar edhe gjatë shtatorit.

“Nga disa, Shqipëria konsiderohet si Kroacia e re, dhe ky është një krahasim jo i ekzagjeruar, pasi Shqipëria është e pasur me histori, kulturë, plazhe fantastike dhe një natyre luksi”, kështu e nis Ansa përshkrimin e Shqipërisë.

“Shtatori është periudha ideale për ta vizituar, pasi mund të vizitohen 460 kilometra vijë bregdetare pa mbipopullimin e verës dhe me një klimë të freskët mesdhetare”, vijon më tej shkrimi, transmeton “ATSH”.

Ndër të tjera, agjencia shtetërore e lajmeve në Itali sqaron se, në Shqipëri ke mundësi të zgjedhësh, duke filluar që nga plazhi, nga Velipoja në Ksamil ka tipologji të ndryshme, përcjell albinfo.ch.

Vendet e tjera të këshilluara janë Buenos Aires, Korfuzi, Zanzibari dhe Marakeshi në Marok.

Gjatë viteve të fundit, e sidomos gjatë këtij viti, turistët italianë në Shqipëri janë rritur ndjeshëm, dhe shifrat e vërtetojnë më së miri këtë tendencë të re.

Një ndikim të madh në këtë preferencë të re të italianëve kanë dhënë padiskutim edhe mediat, që kanë promovuar masivisht turizmin shqiptar.

---