Ansambli “Trojet” shënoi 18-vjetorin e Pavarësisë së Kosovës

Programi artistik solli një mozaik të pasur folklorik me valle dhe këngë nga treva të ndryshme shqiptare, të interpretuara nga grupmosha të ndryshme

Në Winterthur u organizua një manifestim festiv nga Ansambli “Trojet” me rastin e 18-vjetorit të Pavarësisë së Kosovës, duke mbledhur qindra bashkatdhetarë nga diaspora shqiptare në Zvicër. Mbrëmja u zhvillua në një atmosferë të ngrohtë dhe festive.

Të pranishmit u mirëpritën nga kryetari i ansamblit, Zeqë Gashi, ndërsa në aktivitet morën pjesë edhe përfaqësues diplomatikë dhe figura të jetës shoqërore e kulturore, përfshirë ambasadorin e Maqedonisë së Veriut në Bernë, Rexhep Demiri si dhe përfaqësues nga Konsullata e Kosovës në Cyrih dhe veprimatrë të tjerë të diasporës.

Programi artistik solli një mozaik të pasur folklorik me valle dhe këngë nga treva të ndryshme shqiptare, të interpretuara nga grupmosha të ndryshme, duke reflektuar gjallërinë dhe vazhdimësinë e traditës në diasporë.

Një moment i veçantë ishte edhe hapja simbolike me elemente artistike që spikatnin rolin e familjes dhe trashëgimisë në ruajtjen e identitetit kombëtar.

Ky manifestim konfirmoi edhe një herë rolin e rëndësishëm të diasporës shqiptare në Zvicër në kultivimin dhe përcjelljen e vlerave kulturore dhe historike ndër breza.

---