Ansambli “Vatra” në Bülach shënon 30 vjetorin e themelimit

Ansambli “Vatra” është themeluar në vitin 1995 dhe gjatë tri dekadave ka zhvilluar një veprimtari të pandërprerë kulturore në kuadër të komunitetit shqiptar në Zvicër

Ansambli Kulturor “Vatra” shënon 30-vjetorin e themelimit me një aktivitet festiv që do të mbahet më 14 qershor 2025 në qytetin e Bülach-ut. Në fokus të këtij jubileu do të jetë një koncert artistik që paraqet rrugëtimin dhe angazhimin shumëvjeçar të ansamblit në ruajtjen dhe promovimin e kulturës shqiptare në diasporë.

Programi parashikon fillimin në ora 18:00 me një apero mirëseardhjeje, i pasuar nga një mbrëmje me përmbajtje artistike që përfshin valle tradicionale, muzikë dhe këngë popullore shqiptare. Drejtimi artistik i koncertit i është besuar koreografit Prof. Xhemali Berisha.

Ansambli “Vatra” është themeluar në vitin 1995 dhe gjatë tri dekadave ka zhvilluar një veprimtari të pandërprerë kulturore në kuadër të komunitetit shqiptar në Zvicër. Aktiviteti jubilar vlerëson këtë trashëgimi dhe synon të mbledhë pjesëtarë të komunitetit dhe publikun e interesuar për të ndjekur nga afër një përfaqësim të elementeve tradicionale shqiptare.

Ngjarja është e hapur për publikun dhe mediat janë të mirëseardhura për mbulim dhe raportim.

Kontakt për informacione shtesë apo akreditim mediatik:
[email protected]
www.ansambli-vatra.ch

 

---