Apelohet për kujdes në rrugët e Kosovës

Ministri i Infrastrukturës i Kosovës, Pal Lekaj, u ka bërë thirrje të gjithë vozitësve t’u përshtaten kushteve atmosferike dhe të mos dalin në rrugë pa pajisje dimërore.

Ai ka thënë se puna e kompanive të pastrimit po vazhdon, edhe pse reshjet e borës nuk po ndalën, përcjell albinfo.ch.

Ministri ka njoftuar se të gjitha rrugët në vend janë të kalueshme, por në disa pjesë me vështirësi.

“Bora nuk po ndalet, e as puna për ta pastruar atë. Kompanitë e kontraktuara dhe ekipet e Ministrisë së Infrastrukturës janë në terren gjithandej Kosovës për të mundësuar qarkullim në të gjitha rrugët rajonale, nacionale dhe autostrada”, ka shkruar ministri në një postim në Facebook.