Arbër Çekaj shpallet në kërkim ndërkombëtar për kokainën  

Ai rezulton se është larguar nga Shqipëria tre ditë para sekuestrimit të ngarkesës me kokainë në magazinat e tij në portin e  Durrësit

Gjykata e Krimeve të Rënda në Tiranë ka mbështetur kërkesën e Prokurorisë së Krimeve të Rënda për të dhënë masën e “arrestit me burg në mungesë” për pronarin e shoqërisë “Arbri Garden” i cili kishte porositur kontenierin me banane nga Kolumbia e në të cilën u kapën me 613 kg kokainë me vlerë tregu 180 milionë euro.

Me marrjen e këtij vendimi policia e ka shpallur në kërkim ndërkombëtar Arbër Çekaj i cili rezulton se është larguar nga Shqipëria tre ditë para sekuestrimit të ngarkesës me kokainë në magazinat e tij në portin e  Durrësit.

E Ambasadori amerikan në Tiranë Donald Lu ka komentuar për herë të parë kapjen e 613 kg kokainë në Shqipëri. Duke qenë se ai vete personalisht kishte folur për kapjen e peshqve të mëdhenj nisur nga janari, televizioni “News e 24” e ka pyetur: A mund të konsiderohet peshk i madh, Arber Cekaj, pronari i kompanisë ku u gjet lënda narkotike? E ambasadori është përgjigjur: “Arbër Cekaj nga çdo këndvështrim është peshk i madh”.