Arlind Hani, modeli me “fytyrën e Jezusit”

«Jezus», kishte bërë shaka një fotograf në momentin kur para objektivit të tij kishte vendosur modelin e ri nga Korneoburgu austriak, Arlind Hanin

Një juri ndërkombëtare i ka ndarë vendin e dytë Arlind Hanit, këtij modeli të ri nga Austriia me prejardhje shqiptare. Ai këtë vend e ka merituar në një konkurrencë të vështirë, në mesin e 200 pjesëmarrësve në garën e modeleve meshkuj «Jademodels 2015», shkruan NÖN.

E veçanta e suksesit të shqiptarit 22 vjeçar, është se pamja e tij gjithsesi tërheqëse, po identifikohet me figuren e Jezusit dhe kjo, në atmosferën rreth Krishtlindjes ka bërë jehonë të konsiderueshme në shtypin austriak.

«Jezus», kishte bërë shaka një fotograf në momentin kur para objektivit të tij kishte vendosur modelin e ri nga Korneoburgu austriak. Ndërsa juria kështu e ka vlerësuar struganin: «ai mbase nuk mundet të ecë mbi ujë (sikur Jezu Krishti), por nëpër pasarelë po ec veçanërisht mirë», transmeton albinfo.ch.

Me vetëm 1.77 metër gjatësi, Hani ka qenë pjesëmarësi më i shkurtë që ia kidhte dalë ndonjëherë të ngritej në mesin e më të mirëve në këtë garë. «Dhe po të ishte mbi 1.80 i gjatë ai do të fitonte», ka thënë njëri nga anëtarët e jurisë.

Arlind Hani edne nuk ka ndonjë përvojë të gjatë në shoubiznes. «Një mike më ka motivuar që të konkurroj», thotë ai. Se a do të vendosë të kalojë në botën e modës, Arlindi nuk ka vendosur ende. «Në fakt më tepër më pëlqen aktrimi», zbulon ai. Kam dëshirë të futem në role», përcjell albinfo.ch. Dhe në këtë drejtim atë e favorizon sigurisht fytyra interesante dhe individualiteti i veçantë.

Një fotograf nga Spanja i ka thënë atij se do të donte ta angazhojë për projektin e tij të ardhshëm mbi Jezusin. Por, a e ka dëgjuar Hani shpeshherë nga të tjerët këtë krahasim që i bëhet ? «Miqtë më ngacmojnë nganjëherë me këtë ngjashmëri», thotë ai.