Arrestohen 10 persona në xhaminë e kontestuar: Kanë rrahur dy besimtarë

Akuzohen se i kanë sulmuar dy besimtarë të tjerë të po kësaj xhamie, për faktin se ata u kanë dhënë informacione të brendshme një gazetari

(KEYSTONE/Walter Bieri)

Autoritetet e ndjekjes të Kantonit të Cyrihut kanë arrestuar sot në mëngjes dhjetë persona nga rrethi i frekuentuesve të xhamisë tashmë të njohur si vatër e ekstremizmit, “An`Nur” në Winterthur. Ata akuzohen se i kanë sulmuar dy besimtarë të tjerë të po kësaj xhamie, për faktin se ata u kanë dhënë informacione të brendshme një gazetari, shkruan srf.ch dhe mediat tjera zvicerane.

Më 22 nëntor të vitit 2016 në xhaminë e përmendur thuhet të ketë shpërthyer një konflikt i ashpër, me ç`rast një numër i madh i të pranishmëve kanë sulmuar dy besimtarët, transmeton albinfo.ch. Ata, sipas prokurorisë përgjegjëse i kanë rrahur, keqtrajtuar dhe i kanë mbajtur mbyllur. Sulmi kishte ndodhur më 22 nëntor. Viktimat janë rrahur, abuzuar dhe rrëmbyer. Familjet e tyre kanë marrë edhe kërcënime me vdekje.

Si shkak për këtë konflikt ka shërbyer një raport që kanë botuar mediat lidhur me një predikim në të cilin ish imami i kësaj xhamie kishte apeluar për dhunë ndaj atyre myslimanëve të cilët nuk u përmbahen detyrimeve për t`i kryer lutjet fetare.

Prokuroria e përgjithshme, ajo për të rinj, Policia Kantonale e Cyrihut dhe Policia e qytetit e Winterthurit, për këtë arsye sot në mëngjes kanë arrestuar dhjetë të dyshuar, të moshave nga 17 deri në 53 vjeçare. Po ashtu janë kryer  bastisje në rreth dhjetë shtëpi në vende të ndryshme.