Ashpërsohet dënimi për synetinë e femrave

Do të dënohet edhe personi që jeton në Zvicër, i cili e ka bërë këtë veprim në ndonjë vend ku synetia e femrave është e lejuar

Parlamenti Federal është shprehur pothuaj njëzëri për ndalimin e gjymtimit të gjenitalieve të femrave (synetisë), një tradite brutale ende të gjallë në disa qarqe myslimane të Afrikës e gjetiu.

Kanë qenë 162 deputetë që kanë votuar për ndryshimin e ligjit me të cilin ashpërsohet dënimi për këtë vepër penale dhe vetëm 2 sish kanë votuar kundër.

Me këtë votim, Parlamenti unifikon qëndrimin me Qeverinë Federale sipas të cilit synetia e femrave, e bërë në cilëndo formë, duhet të ndiqet dhe të dënohet penalisht.

Kjo nënkupton se do të dënohet edhe personi që jeton në Zvicër, i cili e ka bërë këtë veprim në ndonjë vend ku synetia e femrave është e lejuar. Po ashtu, edhe në rastet kur synetia bëhet me pranimin e viktimës, vepra vazhdon të mbetet e dënueshme.

Masa ndëshkuese për synetinë e femrave fillon nga gjoba me të holla (180 njësi pune) deri në dhjetë vjet heqje lirie.