Atentati me tre të vdekur në Shkodër

Shkodra u trondit të mërkurën pasdite kur në fshatin Dobraç pas një atentati vdiqën tre persona. Në mesin e viktimave ishte edhe një grua, kalimtare e rastit, përcjell albinfo.ch.

Siç raporton “Top Channel”, të vdekur mbetën Hamza Lici, Arlind Bushati dhe Flutura Basha, ndërsa po lufton për jetën bashkëshorti i saj Bashkim Basha, edhe ky viktimë e pafajshme.

Si ndodhi ngjarja?

Një veturë në lëvizje me autorë ende të paidentifikuar qëlloi me breshri automatiku drejt Hamza Licit dhe Arlind Bushatit.

Lici vdiq në vend, ndërsa Bushati luftoi për jetën në spital për disa orë pasi mori një plumb në kokë.

Lici dhe Bushati po udhëtonin nga Shkodra drejt Koplikut me një Mercedes me targa kroate, në momentin që u qëlluan.

Viktima Hamza Lici është vëllai i Ibraim Licit, i kërkuar për vrasje dhe udhëheqës i atij që njihet si fisi Lici.

Para disa ditësh, Arlind Bushati denoncoi në polici një atentat të dështuar ndaj tij në qendër të qytetit të Shkodrës. Ai po qëndronte jashtë një lokali kur dy të rinj iu afruan me motor dhe i drejtuan armën, por dyshohet se arma u është bllokuar.

Në masakrën me tre viktima, e vdekur mbeti edhe një kalimtare e cila po udhëtonte më motor së bashku me bashkëshortin.

Bashkim Basha dhe Flutura Basha kanë qenë duke udhëtuar me motor kur Mercedesi me të cilin po udhëtonte Lici dhe Bushati ka humbur kontrollin dhe i ka përplasur.

Për shkak të plagëve të rënda Flutura Basha vdiq menjëherë, ndërsa Bashkim Basha vazhdon të jetë në gjendje të rëndë, aktualisht i vetmi i mbijetuar nga ngjarja.

Një veturë e tipit Land Rover u gjet i djegur është gjetur në fshatin Grudë e re të Shkodrës 10 minuta pas ngjarjes. Brenda saj janë gjetur 2 automatikë, të cilët dyshohet se janë përdorur në atentat.

Në veturën me të cilën po udhëtonin viktimat Hamza Lici dhe Arlind Bushati u gjetën tre pistoleta.

Dyshimet e para nga atentati janë përplasjet mes dy grupeve në Shkodër, Bajrat dhe Licët.

Deri më tani disa persona janë shoqëruar në komisariat, por nuk janë identifikuar autorët.

---