Azilkërkuesit mund të vendosen në ndërtesat e familjes shqiptare

Banorët e Aarburgut kanë kundërshtuar mëkot vendosjen e azilkërkuesve në komunëne tyre. Pronare e ndërtesave të dhëna me qira është një familje kosovare

Rezistenca kundër qendrës së azilit e banorëve të komunës Aarburg të kantonit Aargau nuk ka prodhuar fryte. Qeveria e Kantonit, gjegjësisht departamenti për ndërtimtari ka vendosur që kjo qendër për strehim të azilkërkuesve megjithatë të hapet, duke injoruar kundërshtimet e qytetarëve.

Asambleja komunale e Aarburgut pati vendosur para dy muajsh në mënyrë unanime kundërshtimin e hapjes së qendrës së azilit në këtë komunë. Më vonë, pasi që kantoni ishte treguar këmbëngulës, komuna kishte sjellë argumente lidhur me papërshtatshmërinë e ndërtesave që viheshin në dispozicion të azilkërkuesve. Ato kanë infrastrukturën e nevojshme për 30 deri 40 banorë ndërsa numri i azilkërkuesve që do të strehohen aty është rreth 90 sish, arsyetohej komuna.

Me vendimin e qeverisë së kantonit, azilkërkuesit mund të fillojnë vendosjen e tyre në dy ndërtesat për banim familjar që shteti i ka marrë me qira nga pronarët privatë. Marrëveshja me pronarët e banesave është nënshkruar për së paku pesë vjet.

Siç kanë shkruar mediet zvicerane, pronarët e ndërtesave që i janë dhënë me qira shtetit për të strehuar azilkërkuesit, janë kosovarë. Bëhet fjalë për tre vëllezër dhe babain e tyre. Ata nuk kanë dashur të identifikohen për medie por në emrin e pronarëve ka folur avokati i njohur në Zvicrën gjermane, Valentin Landmann. Ai ka theksuar për azonline.ch se kosovarët, përveç leverdisë së qartë që kanë nga dhënia me qira e ndërtesave për shtetin, me këtë duan të japin edhe një kontribut në strehimin cilësor të azilkërkuesve.

Sipas tyre, vendosja në një ndërtesë solide është edhe një kusht që ata të ndjehen të mirëpritur dhe të mos devijojnë në delinkuencë.