Bajram Shillova përballë flakëve: guximi që shpëtoi një jetë

Në Schattdorf të Kantonit Uri, reagimi i menjëhershëm i një qytetari bëri dallimin mes jetës dhe vdekjes

“Dëgjova britmat e gruas nga kati i tretë dhe në atë moment nuk mendova për rrezikun apo për veten. Zjarri ishte shumë i fortë dhe çdo sekondë dukej vendimtare. Kur pashë traktorin që po kalonte, veprova instinktivisht. Falë Zotit arritëm ta shpëtonim dhe u larguam vetëm pak çaste para se të shpërthente bombola e gazit. Ajo që ka rëndësi është se jeta e saj u shpëtua.”

Një akt i jashtëzakonshëm guximi qytetar u shënua më 15 dhjetor 2025 në Schattdorf, në Kantonin Uri, ku Bajram Shillova, punëtor ndërtimi nga Dietikoni, rrezikoi jetën për të shpëtuar një grua të bllokuar në një ndërtesë banimi të përfshirë nga zjarri.

 

Shillova ndodhej në krye të detyrës profesionale së bashku me kolegët e tij, në afërsi të vendit të ngjarjes, kur vuri re flakët që kishin kapluar një shtëpi në Dorfstrasse. Nga kati i tretë të objektit dëgjoheshin thirrje të dëshpëruara për ndihmë, ndërsa përpjekjet për hyrje nga brenda rezultuan të pamundura për shkak të zjarrit intensiv dhe tymit të dendur.

Në një moment vendimtar, ai ndaloi një traktor që po kalonte në rrugën kryesore dhe, me ndihmën e një shkalle të gjatë, arriti të ngjitet deri te dritarja e katit të tretë, duke e evakuuar gruan nga rreziku i menjëhershëm. Vetëm pak çaste pas largimit nga objekti, në ndërtesë shpërtheu një bombol gazi, çka dëshmon rrezikun ekstrem të situatës dhe rëndësinë jetike të ndërhyrjes së shpejtë.

“Nuk jam hero. Thjesht bëra atë që mendova se duhej bërë në atë moment. Kur një jetë është në rrezik, nuk ka kohë për mendime të gjata, ka vetëm përgjegjësi njerëzore,” thekson Bajram Shillova.

Ngjarja në Schattdorf  është një dëshmi e fuqishme e guximit qytetar dhe solidaritetit njerëzor, duke treguar se në situata ekstreme, veprimi i menjëhershëm dhe vendosmëria mund të bëjnë dallimin vendimtar mes jetës dhe vdekjes.

Për albinfo.ch
Luljeta Ademi

 

---