Banka Qendrore e Kosovës do të marrë pjesë në takimin e Brukselit për dinarin

BQK

Banka Qendrore e Kosovës do të marrë pjesë në takimin lidhur me ndalimin e përdorimit të dinarit si mjet pagese në Kosovë.

Nga ky institucion kanë thënë se kohë më parë kanë shprehur gatishmërinë që të angazhohet dhe takohet edhe me Bankën Popullore të Serbisë, NBS, transmeton albinfo.ch.

“Banka Qendrore e Republikës së Kosovës (BQK) kohë më parë ka shprehur gatishmërinë që të angazhohet dhe takohet edhe me Bankën Popullore të Serbisë (NBS), për të fasilituar në përzgjedhjen e opsionit me të lehtë për procesin e transferimit të mjeteve përmes kanaleve bankare në llogaritë e përfituesve (në Euro). Në këtë kuptim, edhe i përgjigjet ftesave kur janë të nevojshme, për takime të tilla informuese, siç edhe ka bërë në vazhdimësi edhe me prezencën ndërkombëtare në vend”, thuhet në përgjigjen e BQK-së për Kohën.

Nga Qeveria e Kosovës nuk është bërë e ditur se kush do ta përfaqësojë Kosovën, ndërsa në Serbi kanë deklaruar se ky vend do të përfaqësohet nga kryenegociatori Petar Petkoviq.