Banorët e Jalës kundërshtojnë aksionin për rrëzimin e objekteve

Inspektorati Kombëtar i Mbrojtjes së Territorit mëngjesin e sotëm ka nisur aksionin për shembjen e ndërtimeve pa leje në Jalë.

Por ky aksion ka hasur në kundërshtim të fortë nga banorët, të cilët janë ankuar, duke thënë se nuk janë njoftuar për një vendim të tillë.

Banorët i kanë thënë policisë që po e asiston IKMT-në se ka ende pushues në dhomat e tyre, përcjell albinfo.ch.

Banorët thonë se po i nxjerrin me dhunë. Ndërkaq, kanë theksuar se janë me dokumente të rregullta dhe se çështjen e kanë apeluar edhe në gjykatë. Ky aksion ka për qëllim rrëzimin e shtatë objekteve lokale e banesa.

“I kemi bërë me gjak. Asnjë lloj dokumentacioni, këta janë të gjithë kriminelë nga i pari tek i fundit (u drejtohet policëve). Nuk mund ta marrë Edi Rama pronën tonë”, ka thënë një banor.