Barezi: Në Kosovë ka talent të futbollit

Legjenda e futbollit të Milanit, Franko Barezi, ka deklaruar se në Kosovë ka talent të futbollit.

“Milan është i interesuar që të zbulojë talent dhe nga ky kamp që mbahet këtu pesë fëmijë nga Kosova, do të kenë rastin të shkojnë në Itali. Jemi të interesuar që nga ky kamp të marrin pjesë fëmijë dhe t’i trajnojmë në Itali. Do të bëjmë të pamundurën të mundshme që këta pesë djem të jenë sa më afër Milanit”, ka theksuar Barezi.

Njeriu që ka lënë gjurm të pashlyer në gjigantin italian, ka thënë se ndihet i lumtur që Milan Junior Kamp, ka nisur edhe në Kosovë.

“Milan Junior Kamp mbahet në katër vende të botës dhe jam i kënaqur që tashmë jemi edhe këtu”, ka deklaruar Barezi.

I kënaqur me kampin që do të mbahet të hënën në Prishtinë, është shprehur edhe Marko Shembri, i cili është pjesë e ekipit të Milan Junior Kamp.

Sipas tij, ky kamp është rast i mirë që edhe trajnerët e Kosovës të marrin përvoja nga trajnerët e Milanit.

Kurse, Davide Curti, trajner i këtij kampi, ka thënë se nuk është lehtë të luash në Milan dhe se kjo varet nga talenti të cilin posedojnë lojtarët.