Begaj: Shqipëria është avokatja më e mirë e Kosovës në arenën ndërkombëtare

Begaj takim me presidentin gjerman: Berlini, mbështetje për avancimin e reformave në Shqipëri

Presidenti i Shqipërisë, Bajram Begaj, ka thënë se Kosova është interesi më madhor i Shqipërisë.

Begaj ka falënderuar presidentin Steinmeier për kontributin në forcimin e marrëdhënieve dhe partneritetit mes dy vendeve.

“Takimi, tregues i bashkëpunimit të shkëlqyer politik dhe i vëmendjes së vazhdueshme të Gjermanisë ndaj Shqipërisë, garanci për mbështetjen e Gjermanisë për integrimin e Shqipërisë në BE. Gjermania është mbështetje për avancimin e reformave në Shqipëri dhe zhvillimin e vendit.

Roli i Gjermanisë në Ballkanin Perëndimor i pazëvendësueshëm përballë sfidave që komprometojnë të ardhmen euroatlantike. Duhet bashkëpunim i ngushtë rajonal. E ardhmja evropiane, udhërrëfyes për begatinë e rajonit”, tha Begaj.

Ai, në një intervistë për DW ka thënë se Shqipëria është avokatja më e mirë e Kosovës në arenën ndërkombëtare dhe në çdo organizatë ndërkombëtare dhe çdo iniciativë rajonale përmendet dhe mbrohet Kosova.

“Patjetër që ne do të kemi këtë bashkëpunim dhe në të ardhmen nuk mendoj që ka vend për pakënaqësi. Ne jemi aty, do të jemi gjithmonë në mbështetje të Kosovës. Para dy ditësh isha në Kosovë, mora pjesë në festimet e 25-vjetorit të çlirimit të Kosovës, kjo tregon që marrëdhëniet tona janë të shkëlqyera”, ka thënë Begaj.

Ndër të tjera, ai ka folur edhe për takimin e ardhshëm në kuadër të Procesit të Berlinit, prej të cilit ka pritshmëri pozitive.

“Patjetër që unë e shikoj procesin e Berlinit si një proces që duhet të përshpejtojë procesin e anëtarësimit të Ballkanit Perëndimor në BE. Vitin e shkuar patëm fatin ta organizojmë procesin e Berlinit me mjaft sukses dhe të gjitha ato elementë që lidhen me adresimin e çështjeve për t’u zgjidhur, gjatë këtij samiti do të adresohen për zgjidhje dhe do të gjejmë vendin e merituar”, ka pohuar Begaj.

 

---