Behrami: Vendimi ishte politik

Valon Behrami ka folur për largimin nga Kombëtarja zvicerane

Valon Behrami është përjashtuar nga Përfaqësuesja e Zvicrës. Një lajm që bëri bujë në mediat ndërkombëtare. 33-vjeçari ishte rekordmen me pjesëmarrje në katër Botërore, përcjell albinfo.ch.

Ai në një intervistë për televizionin “RSI”, ka treguar si ka ndodhur ngjarja. “Të parin e kam thirrur Granit Xhakën në telefon për t’i treguar për vendimin. I kam thënë se do të jesh lider i ekipit dhe ai më tha se do të ndjek shembullin tim”, deklaroi Behrami.

Mesfushori shqiptar ishte kontaktuar me telefon nga Vladimir Petkoviq. “Isha i befasuar. Mendova se ishte një thirrje mirësjellje, por jo, ishte të më thoshte se nuk do të luaja më shumë për ekipin zviceran. Jam shumë i zhgënjyer. Do të kisha dashur që Petkoviq të më shikonte në sy”, ka theksuar tutje mesfushori shqiptar.

“Dëbimi është një vendim politik i vendimmarrësve që nuk kanë asnjë lidhje me sportin dhe futbollin, dhe nuk kanë luajtur kurrë vetë”, nënvizoi 33-vjeçari.

Ai ka shtuar se Xhaka dhe Shaqiri kanë pasur arsye të fortë të lëshojnë ekipin kombëtar, derisa ai ka luajtur rol që ata të mos largohen.

Ndërkohë, Vladimir Petkoviq është shprehur se ky ishte vendim sportiv.