Belgjika fut 9 kantone zvicerane në “Zonën e portokalltë”

Niveli paralajmërues, "i portokalltë" vlen për kantonet në vijim: Basel-Stadt, Gjenevë, Glarus, Lucern, Vaud, Schaffhausen, Schwyz, Zug dhe Cyrih

Belgjika po ua ndryshon vendin kantoneve zvicerane në listën e saj të vendeve të rrezikut për koronavirus. Në parim, udhëtimeve në Zvicër u jepet drita e gjelbër, por që nga e premtja nëntë kantone kanë hyrë në listën e rrezikut.

Niveli paralajmërues “i portokalltë” vlen për kantonet në vijim: Basel-Stadt, Gjenevë, Glarus, Lucern, Vaud, Schaffhausen, Schwyz, Zug dhe Cyrih, përcjell albinfo.ch. Të gjitha këto kantone paraqiten në listën përkatëse të Ministrisë së Punëve të Jashtme belge.

“Vigjilencë e shtuar” vlen për nëntë kantonet – ndërsa karantina ose një test për koronavirus rekomandohen me rastin e kthimit, por nuk janë të detyrueshme.

Kantoni i Gjenevës është një nga “fituesit” e zhvillimit të fundit. Javën e kaluar, kantoni ishte në listën ” e kuqe” – udhëtimi për atje ishte i ndaluar, të kthyerit duhej të futeshin në karantinë. Por Gjeneva tani është hequr nga lista e kuqe dhe është vendosur në listën e portokallit, sikur tetë kantone tjera.

Kantoni i Graubündenit gjithashtu mund të marrë frymë më lirisht, transmeton albinfo.ch. Më parë ai ndodhej në listën e “portokallt” ndërsa tani është hequr plotësisht nga lista.

Graubündeni është një destinacion i popullarizuar i pushuesve belgë në muajt e verës. Vitin e kaluar turistët belgë kanë realizuar 62.000 bujtje gjatë muajve të verës në Graubünden.

---