Berna kërkon sqarime nga autoritetet kosovare mbi raportin e Marty-t

Departamenti i Jashtëm kërkon nga autoritetet kosovare dhe ndërkombëtare që të kontribuojnë në sqarimin e akuzave

Qeveria federale e Zvicrës ka kërkuar sqarime lidhur me raportin e Dick Martyt që bën fjalë për implikimin e mundshëm të kryeministrit të Kosovës Hashim Thaçi në atë që ai quan „tregti me organe”, të zhvilluar, sipas tij, në përfundim të luftës në Kosovë.

Departamenti i Jashtëm kërkon nga autoritetet kosovare dhe ato ndërkombëtare në Kosovë që të kontribuojnë në sqarimin rreth akuzave të cilat i ka ngritur Dick Marty.

“Tashti duhet që autoritetet përgjegjëse, përfshirë dhe ato ndërkombëtare, t`i ndërmarrin hapat e tyre juridikë”, kanë thënë përgjegjësit e departamentit në fjalë për mediet zvicerane, duke përmendur se EULEX-i tashmë është duke kryer hetime në këtë drejtim.

Ambasadori i Zvicrës në Këshillin e Evropës, Christian Meuwly në fjalën e tij ka kërkuar që akuzat e publikuara të Martit të ndiqen edhe në rrugë juridike. Po ashtu, Departamenti i Jashtëm i Qeverisë së Zvicrës bën të ditur se Zvicra mbështet përpjekjet për qartësimin e zhdukjes së një numri të madh të njerëzve gjatë luftës në Kosovë.

Në konferencën për shtyp të mbajtur sot në Paris, Dick Marty ka përsëritur edhe një herë akuzat e tij drejtuar udhëheqjes kosovare. Ai ka thënë se posedon fakte dhe indikacione për ato që ka deklaruar, ndërsa tash është në dorë të autoriteteve përgjegjëse gjyqësore që t`i sigurojnë dëshmitë.

Marty, në raportin e tij ka drejtuar akuza po ashtu të rënda në adresë të kryeministrit kosovar dhe UÇK-së për përfshirje në tregti me drogë.