Bleu banesë në Gjermani, por u pendua: “Mendova se do të shpëtoja nga qiraja, por shpenzimet më rënduan”

Një emigrant nga Ballkani tregon për kostot reale të të qenit pronar banese në Gjermani

Blerja e një banese në Gjermani shpesh konsiderohet si një investim i sigurt dhe një mënyrë për t’u çliruar nga pagesa e qirasë. Megjithatë, për disa pronarë realiteti rezulton më i kushtueshëm nga sa pritej, transmeton albinfo.ch.

Një emigrant nga Ballkani ka ndarë në rrjetet sociale përvojën e tij, duke treguar se sa kushton në të vërtetë të jesh pronar i një banese në Gjermani, shkruajnë mediat kroate.

Ai rrëfen se tetë vite më parë bleu një banesë me kredi 20-vjeçare, me bindjen se më në fund do të jetonte “në shtëpinë e tij” dhe do të shpëtonte nga qiraja. Por sipas tij, shpenzimet reale nisën pikërisht pas blerjes.

Shpenzime mujore më të larta se sa pritej

Sipas përllogaritjeve të tij, vetëm për shpenzimet bazë komunale paguan rreth 500 deri në 550 euro në muaj.

Ai tregon se shpenzimet përfshijnë:

• rreth 150 euro për ngrohje

• 80 euro për energji elektrike

• 50 euro për ujë dhe kanalizim

• 70 euro për gaz

• 30 euro sigurim banese

• 40 euro tatim mbi pronën

• rreth 50 euro për ashensorin dhe pastrimin e korridorit

Përveç këtyre, sipas tij, gjithmonë ka riparime dhe defekte të vogla që shtojnë të paktën edhe 50 euro në muaj.

Investime të papritura në ndërtesë

Përveç shpenzimeve të përditshme, pronarët duhet të marrin pjesë edhe në investime të mëdha në ndërtesë. Ai thotë se deri në fund të gushtit duhet të paguajë 18.000 euro për fasadën e re të ndërtesës, një shpenzim që e rëndon edhe më shumë buxhetin familjar.

Edhe pasi të shlyejë kredinë, ai vlerëson se shpenzimet mujore për mirëmbajtjen e banesës do të mbeten rreth 550 deri në 600 euro.

Jo shumë më lirë se qiraja

Sipas tij, kjo shumë nuk është shumë më e ulët se qiraja për një banesë në Gjermani, e cila shpesh arrin 800 deri në 900 euro në muaj me shpenzime të përfshira.

Një tjetër problem, siç thotë ai, janë edhe marrëdhëniet me fqinjët.

“Kam problem me fqinjin mbi banesën time, i cili bën vazhdimisht zhurmë dhe nuk kujdeset për askënd. Kur je pronar, të gjitha problemet bien mbi ty – riparimet, ankesat dhe bisedat”, shprehet ai.

Paralajmërim për ata që planifikojnë të blejnë banesë

Ai thekson se blerja e një banese nuk do të thotë automatikisht fund i shqetësimeve financiare, por shpesh sjell detyrime afatgjata dhe stres financiar.

“Njerëzit mendojnë se kur blen një banesë e ke zgjidhur jetën. Por realiteti është se çdo muaj mezi merr frymë nga shpenzimet. Prandaj, nëse planifikoni të blini banesë në Gjermani, kontrolloni me kujdes të gjitha detajet dhe kostot reale”, përfundon ai.

---