Bosch konfirmon raportin holandez për rikthimin e vizave për shqiptarët

Ambasadori Bosch as që e vë në dyshim ekzistencën e raportit, por thotë se ai duhet të mbetej në kuadrin e një dokumenti të brendshëm të policisë

Ish-ambasadori i OSBE-së në Tiranë, së fundmi ambasador i Holandës në Kosovë, Robert Bosch, ka pranuar ekzistencën e raportit të policisë dhe prokurorisë holandeze për rikthimin e vizave për Shqipërinë.

Raporti, që shpreh shqetësim për rritjen e kriminalitetit shqiptar, u mohua nga ambasadorja e Shqipërisë në Holandë. Ambasadori Bosch as që e vë në dyshim ekzistencën e raportit, por thotë se ai duhet të mbetej në kuadrin e një dokumenti të brendshëm të policisë.

“Kemi një problem të madh me shqiptarët në Holandë. Të rinjtë përpiqen të shkojnë me anije drejt brigjeve britanike në mënyrë ilegale. Në të shumtën e rasteve nuk ia dalin dhe jetojnë në rrugë. Ata nuk vjedhin, por ama pjesa më e madhe e njerëzve nuk e pëlqejnë që ata enden rrugëve të Holandës. Holandezët u kërkojnë policëve që t’i dëbojnë, por duke pasur regjim të lirë të vizave, policët nuk mund ta bëjnë këtë.

Këta emigrantë tregojnë në këtë formë se as nuk e kanë idenë se ç’do të thotë regjim i lirë vizash, sepse mendojnë se mund të bëjnë gjithçka.

Kjo gjë u bë e madhe tani, ka shkuar deri në rang ministrish, por le të jemi të arsyeshëm: kriminelët e vërtetë nuk i ndal regjimi i vizave. Do të ishte shumë e padrejtë që njerëzit normalë të jenë viktima dhe e gjitha kjo për faj të një polici”, deklaroi ambasadori.