Cakaj: 80% e stafit të konsullatave do të ndryshojë

Ministri në detyrë për Evropën dhe Punët e Jashtme, Gent Cakaj, ka bërë të ditur se mbi 50 diplomatë shqiptarë në botë do të largohen ose do të transferohen, në kuadër të vazhdimit të reformimit të diplomacisë.

Ministri në një konferencë për media ka deklaruar se Shqipëria nuk meriton asgjë më pak se meritokraci në institucione, transmeton albinfo.ch.

Ministri njoftoi se 80 për qind e stafit të konsullatave të përgjithshme të Shqipërisë do të ndryshojë.

“Lidhur me këtë parim elementar që udhëheq gjithë ndërmarrjen tonë, komunikoj se 80 për qind e konsullatave të përgjithshme të Shqipërisë nëpër botë nuk do të jenë më të njëjta. Ato duhet të ndryshohen rrënjësisht për shkaqe strukturore dhe për nevojën e rritjes së shërbimeve”, deklaroi ai.

Cakaj dha edhe lajmin se mbi 50% e pasaportave diplomatike dhe pasaportave të shërbimit do të shpallen të pavlefshme.

Ai po ashtu tha se mbi 20 konsuj nderi të Shqipërisë nëpër botë nuk do të jenë më të tillë.