Çfarë dihet deri tani për autorin e dyshuar në Kerzers

Autoritetet zvicerane thonë se i dyshuari ishte rreth 60 vjeç, banonte në kantonin e Bernës dhe ishte raportuar më parë si i zhdukur.

Autoritetet zvicerane kanë dhënë vetëm informacione të kufizuara lidhur me autorin e dyshuar të ndjerë në Kerzers. Sipas tyre, detaje të mëtejshme do të publikohen vetëm pasi të informohen fillimisht familjet e viktimave, transmeton albinfo.ch.

Deri më tani, policia ka bërë të ditur se autori i dyshuar ishte “me sa duket zviceran” dhe banonte në Bern. Ai dyshohet të ketë qenë rreth 60 vjeç dhe, sipas autoriteteve, kishte probleme të shëndetit mendor.

Siç njoftoi Raphaël Bourquin, Prokurori i Përgjithshëm i kantonit Fribourg, i dyshuari ishte raportuar më parë edhe si person i zhdukur.

Gjatë një konference për shtyp, ai u përshkrua si një person që jetonte në margjinat e shoqërisë. Ndërkohë, policia kantonale e Fribourg-ut nuk dha menjëherë informacione për kombësinë e tij, duke theksuar se duhet pritur identifikimi zyrtar përpara publikimit të të dhënave të tjera./Albinfo.ch

---