Çfarë ndryshimesh do të ndodhin konkretisht me reformën AVS/AHV?

Shkruan: Lirim Begzati

Më 25 shtator 2022 populli zviceran votoi dhe e miratoi propozimin e reformës së quajtur AVS 21, e cila do të hyjë në fuqi më 1 janar 2024.

Sipas mbështetësve të kësaj reforme, ndryshimet e propozuara paraqesin një etapë të rëndësishme që çon në drejtim të rritjes së nivelit të rentës AVS dhe stabilizimit të financave të AVS (një vlerësim jo i bashkëndarë nga gjithsecili), me një objektiv të konkretizimit të saj definitiv në vitin 2030.

Një rritje progresive e moshës së pensionimit për gratë

Ndër ndryshimet kryesore që parashikohen sipas reformës në fjalë, mosha e pensionimit për gratë do të kalojë nga mosha 64-vjeçare në atë 65-vjeçare. Ky ndryshim nuk do të bëhet menjëherë, por do të aplikohet një rritje progresive e moshës.

Si mund të ilustrohet dhe të sqarohet kjo konkretisht?

Nga viti 2025:

– për personat (gratë) që kanë lindur në vitin 1960, nuk do të ndryshojë asgjë, pasi që do të mund të vazhdojnë të realizojnë të drejtën e pensionimit në moshën 64-vjeçare, 
,
– kurse për personat e lindur në vitin 1961 do të shtohen tre muaj për dalje në pension (domethënë 64 vjet + 3 muaj, apo dalje në pension në moshën 64-vjeçare e 3 muaj),

– për personat të lindur më 1962, do të shtohen 6 muaj (64 vjet dhe 6 muaj),

– për personat të lindur më 1963, do të shtohen 9 muaj (64 vjet dhe 9 muaj),

– kurse për personat që kanë lindur më 1964 e tutje do të aplikohet mosha 65-vjeçare për pensionim, si për burrat, ashtu edhe për gratë.

Kjo do të ndodhë pra, në vitin 2029.