Çfarë vetura vozitin më shumë shqiptarët

Në Shqipëri, Volkswagen dhe Mercedes-Benz vazhdojnë të jenë markat më të preferuara nga qytetarët, duke mbajtur pozitat kryesore në renditjen e markave më të përdorura të autoveturave

Instituti i Statistikave (INSTAT) i Shqipërisë ka publikuar raportin vjetor “Karakteristikat e Mjeteve Rrugore”, ku ka të dhëna mbi strukturën dhe dinamikën e mjeteve rrugore të regjistruara në vend për vitin 2024.

Sipas statistikave tregohet një rritje të ndjeshme të numrit të mjeteve në qarkullim, një tendencë që reflekton zhvillimet ekonomike, urbanizimin dhe rritjen e kërkesës për lëvizshmëri në Shqipëri.

Në fund të vitit 2024, numri total i mjeteve rrugore të regjistruara në vend (qoftë aktive apo të çregjistruara përkohësisht) arriti në 959, 226, me një rritje prej 10.5% krahasuar me vitin paraprak, duke sinjalizuar gjithashtu një zgjerim të tregut të automjeteve në Shqipëri, shkruan Scan, transmeton albinfo.ch.

Autoveturat përbëjnë pjesën më të madhe rrugore, duke zënë 80.8% të totalit të mjeteve. Ndërkohë, numri i autoveturave për 1,000 banorë është rritur nga 292 në vitin 2023, në 328 në vitin 2024, duke treguar një përmirësim të aksesit të popullsisë ndaj mjeteve të transportit privat.

Sipas ndarjes gjeografike, Qarku i Tiranës mban vendin e parë për nga numri i mjeteve rrugore, me 34.8% të totalit. Pas Tiranës vijnë Durrësi dhe Fieri, që së bashku përbëjnë një përqindje të konsiderueshme të flotës. Ndërsa Durrësi rezulton të ketë numrin më të lartë të autoveturave për 1.000 banorë, me 483, çka tregon një përqendrim të lartë të mjeteve në raport me popullsinë.

Në aspektin teknik, 58.8% e mjeteve që qarkullojnë kanë kambio manuale. Një tjetër tendencë pozitive është rritja e mjeteve të prodhuara pas vitit 2011, të cilat përbëjnë tashmë 44.4% të të gjitha mjeteve. Në Shqipëri, Volkswagen dhe Mercedes-Benz vazhdojnë të jenë markat më të preferuara nga qytetarët, duke mbajtur pozitat kryesore në renditjen e markave më të përdorura të autoveturave.

Sa i përket lëndës djegëse, 72.9% e autoveturave vazhdojnë të funksionojnë me naftë, ndërkohë që përdorimi i automjeteve elektrike ka shënuar një rritje dyfish krahasuar me vitin 2023. Rritja e numrit të mjeteve, përmirësimi i strukturës teknike dhe rritja e përdorimit të makinave të reja dhe elektrike tregojnë se tregu shqiptar po ecën drejt standardeve më moderne të transportit rrugor.

---