Çmimet e karburanteve në nivelin më të ulët për gati pesë vjet

@pixabay

Çmimet e karburanteve nuk kanë qenë kaq të ulëta për gati pesë vjet. Në disa vende, një litër benzinë pa plumb 95 kushton më pak se 1.50 franga. Megjithatë, situata globale gjeopolitike e bën të pasigurt rrjedhën e ardhshme të tyre, transmeton albinfo.ch.

Çmimi i karburanteve kishte shënuar një rritje të madhe në pranverën e vitit 2022, si pasojë e pushtimit të Ukrainës nga Rusia, i cili shkaktoi rritje drastike të çmimeve të naftës. Një litër benzinë “pa plumb 95” atëherë kishte arritur në 2.25 franga.

Që atëherë, tendenca ka qenë rënëse.

“Arsyeja kryesore për çmimet e ulëta është zhvillimi i çmimit të naftës bruto, pra çmimi për fuçi në tregun botëror,” shpjegon Martin Stucky, zëdhënës i Avenergy Switzerland, shoqatës së importuesve të karburanteve. “Ekziston një korrelacion i qartë midis çmimit të blerjes së një produkti dhe çmimit të tij të shitjes. Nëse blini një fuçi me 120 dollarë, çmimi i karburantit do të jetë 1.80–1.90 franga për litër. Ndërsa nëse blini me 60 dollarë, një litër benzinë do të shitet për 1.50–1.60 franga.”

Çmimi i naftës varet shumë nga situata gjeopolitike ndërkombëtare.

Pasiguri për zhvillimet e muajve të ardhshëm

Me tensionet aktuale, veçanërisht rreth Venezuelës, e cila ka rezervat më të mëdha të naftës në botë, zhvillimi i çmimeve të karburanteve në Zvicër për muajt e ardhshëm mbetet i pasigurt.

“Është e pamundur të parashikosh diçka,” thotë Martin Stucky. “Çmimi është jashtëzakonisht i paqëndrueshëm për shkak të tensioneve gjeopolitike që përjetojmë çdo ditë. E vetmja gjë që mund të them është se njerëzimi absolutisht nuk dëshiron çmime të larta energjie. Dhe nuk ka asnjë arsye që çmimi të rritet papritur.”

Eksperti thekson gjithashtu se furnizimi global i naftës është i qëndrueshëm: “Ai plotësohet pa problem nga këto 73 vende prodhuese.”

Një moment nostalgjie: në fillim të vitit 1993, një litër karburant kushtonte… më pak se një frangë: 96 cent për të qenë të saktë.