Demokrati Zviceran dënohet për diskriminim racor ndaj myslimanëve

Schmidhauser, përmes një shkrimi kishte bërë thirrje që myslimanëve të Zvicrës, pa përjashtim, të mos u jepet shtetësia zvicerane

Gjykata e lartë e Thurgaut në Frauenfeld ka vërtetuar dënimin e mëparshëm të Gjykatës së Qarkut në Steckborn, sipas të cilit, kryetari i partisë Demokratët e Zvicrës, Willy Schmidhauser  është shpallur fajtor për diskriminim racor. 

Schmidhauser, përmes një shkrimi të botuar në gazetën e partisë që drejton, kishte bërë thirrje që myslimanëve të Zvicrës, në mënyrë përgjithësuese dhe pa përjashtim, të mos u jepet shtetësia zvicerane. “Ndryshe, lufta dhe vrasjet do të dominojnë përditshmërinë tonë”, kishte shkruar ai në artikullin e përmendur.

Masa e cila i qe shqiptuar nga Gjyqi i qarkut ishte një dënim në të holla me kusht prej 5400 frangash (ose 60 njësi ditore nga 90 franga) dhe një gjobë prej 1170 frangash. Koha provuese e dënimit me kusht i ishte caktuar për tre vjet.

Shkrimi i inkriminuar është botuar në vitin 2007 në gazetën partiake “Schweizer Demokrat” dhe mbante titullin “Përse myslimanët nuk bën të marrin asnjëherë shtetësinë zvicerane”.  Gjyqi i Qarkut në vendimin e tij kishte konstatuar se Schmidhauser me deklarimet e tij ka bërë thirrje për diskriminim të një grupi personash vetëm duke u bazuar në religjionin e tyre dhe se ai kishte identifikuar të gjithë myslimanët me islamistët, shkruan Thurgauer Zeitung. 

Ndërsa Gjykata e lartë e Thurgaut e ka vërtetuar vendimin e përmendur.  Sipas saj, thirrja për mos dhënien e shtetësisë asnjë myslimani, është në vetvete diskriminuese.  Kjo e lëndon dinjitetin e tyre. Gjykata e lartë madje masën ndëshkuese të caktuar nga gjykata e qarkut e konsideron si tepër të ulët, por, në mungesë të një ankese nga prokuroria, ajo nuk ka mundësi të rrisë lartësinë e dënimit.

Në procesin e zhvilluar në Gjykatën e lartë në Frauenfeld, Schmidhauser shoqërohej nga një grup kolegësh të tij partiakë. Pas pledoajeut të avokatit të tij, Schmidhauser filloi të mbante një ligjëratë, të cilën ia ndërpreu kryetari i trupit gjykues.