Disa raste të dyshuara për infektim me koronavirus në Neuchatel

Disa qytetarë që kishin qëndruar në rrethinat e Milanos, për problemet  e tyre me organet e frymëmarrjes janë konsultuar në qendrën emergjente në Neuchatel

Në Kantonin Neuchatel është raportuar për një numër personash për të cilët dyshohet se janë të infektuar me koronavirus, shkruan srf.ch. Disa qytetarë të këtushëm të cilët kishin qëndruar në rrethinat e Milanos, në Itali, për problemet  e tyre me organet e frymëmarrjes janë konsultuar në qendrën emergjente të rrjetit të spitaleve të Neuchatelit.

Në mesin e rasteve të dyshuara janë edhe tre fëmijë. Këta u takojnë dy familjeve të ndryshme që kanë qëndruar në regjionin e Milanos, transmeton albinfo.ch. Në njërin nga rastet, rreziku i ekspozimit ndaj virusit konsiderohet i ulët. Ndërsa në një nga rastet tjera, gjatësia e qëndrimit në zonën e përmendur, e ka bërë të mundshëm ekspozimin ndaj koronavirusit, thuhet në një njoftim nga autoritetet e Kantonit Neuchatel.

Mjeku kantonal ka marrë raportin edhe për një person i rritur, i cili pas kthimit nga Italia, për shkak të kollitjes dhe temperaturës, kishte kërkuar ndihmën e mjekut, përcjell albinfo.ch. Këto raste të dyshuara do të trajtohen të izoluara në shtëpi , pasi që gjendja e tyre klinike nuk është shqetësuese.

---