Diskutohet roli i shtëpive të pleqve në asistimin e vdekjes në Lucern

Foto ilustrim

Qeveria kantonale e Lucernit po diskuton rregullimin ligjor të asistimit të vdekjes në shtëpitë e pleqve, duke mbështetur kërkesën e Partisë Socialdemokrate që banorët e këtyre institucioneve të kenë të njëjtat të drejta si qytetarët që jetojnë në shtëpi, transmeton albinfo.ch.

Presidentja e Curaviva Lucern, Nadja Rohrer, sugjeron që vendimi për pranimin e asistimit të vdekjes të lihet tek shtëpitë e pleqve, duke vendosur kushte të qarta, si qëndrimi i banorëve në institucion për një periudhë të caktuar. Ajo thekson se kjo do të ndihmojë në parandalimin e “turizmit të vdekjes” dhe do të ruajë ekuilibrin midis kujdesit për banorët dhe stafit.

Disa kantone zvicerane, përfshirë Valais, Cyrih, Nidwalden dhe Zug, kanë rregulluar tashmë këtë çështje, ndërsa në Schwyz institucionet vendosin vetë për praktikat e asistimit të vdekjes. Parlamenti kantonal i Lucernit ka kompetencë të vendosë nëse organizatat e asistimit të vdekjes duhet të kenë akses në të gjitha shtëpitë e pleqve.