Dita e Nora Gjakovës

Në të kaluarën Nora Gjakova ka fituar ndaj kolumbianes Amaris Yadynis dhe kështu është favorite edhe në këtë përballje

Përveç Majlinda Kelmendit, xhudistja tjetër që do të paraqitet sot është Nora Gjakova. Xhudistja nga Peja do të përballet sot (e hënë) në ora 15:30 ndaj kolumbianes Amaris Yadynis, shkruan albinfo.ch.

Në të kaluarën Gjakova ka fituar ndaj kolumbianes dhe kështu është favorite edhe në këtë përballje. Trajneri i Kosovës, Driton Kuka ka folur për garat e Norës. “Nora ka pasur fat jashtëzakonisht të madh në short, por lëndimi na bën pak nervozë për arsye se ajo nuk është në 100 përqindshin e saj. Sidoqoftë shpresoj se në kokën e saj do të ketë një ndryshim pozitiv rreth këtij lëndimi dhe ajo do ta tejkalojë vetveten, sepse realisht kundërshtaret që i ka në grup nuk janë në nivelin e saj.

Kolumbianen Amaris Yadinis e ka mposhtur në të kaluarën shumë lehtë. Mandej në luftën e dytë do të duhej të ndeshej me rumunen Corina Caprioriu, të cilën e ka mposhtur në Lojërat Evropiane në çerekfinale në Baku. Kemi pak nervozë sidomos sot, por shpresoj që gjithçka të shkojë mirë. Kemi bërë përgatitje të jashtëzakonshme, por tani gjithçka mbetet në duart e garueseve tona. Shpresoj të kemi fat e të shkoj gjithçka siç duhet”, ka thënë Kuka.

Për Kosovën deri tash kanë garuar Rita Zeqiri, Urata Rama dhe Qëndrim Guri, të cilët janë eliminuar pa lënë shumë gjurmë.