Dobësimi i opozitës së vërtetë

Dalja e Alma Lamas nga Grupi Parlamentar i Vetëvendosjes, ashtu si edhe e dy deputetëve të LB-së më herët, e kanë ranguar këtë grup parlamentar vetëm në të katërtin e radhës

Pakënaqësia politike dhe ekonomike në Kosovë po shtohet dita – ditës, por jo edhe kundërshtimi i organizuar politik. Grupacione të vogla demonstruesish të organizatava joqeveritare, përmes të cilave drejtuesit e tyre synojnë të katapultohen në politikë, më shumë po dëshmojnë pavendosmërinë e kundërshtimit ndaj qeverisë dhe kryeministrit sesa vendosmërinë për të ndryshuar gjendjen mizerable ekonomike dhe politike në vend.

Edhe opozita e njëmendtë parlamentare është shtuar numerikisht, por është tkurrur dhe dobësuar organizativisht. Ajo që dukej se do të fillonte të ndodhte me largimin e Emin Gërbeshit dhe më vonë edhe të Muhamet Mustafës nga koalicioni qeveritar, i përcjellë me pakënaqësi dhe zëra kritikë edhe të kryeparlamentarit dhe disa deputetëve të tjerë të PDK-së dhe LDK-së, nuk ndodhi. Po ndodh fatkeqësish t e kundërta.

Opozita e vërtetë po dobësohet numerikisht dhe organizativisht. Dalja e Alma Lamas nga Grupi Parlamentar i Vetëvendosjes, ashtu si edhe e dy deputetëve të LB-së më herët, e kanë ranguar këtë grup parlamentar vetëm në të katërtin e radhës. Zatën me largimin e Alma Lamas Vetëvendosja humb një prej zërave më intelektual jo vetëm nga radha e deputeteve të saj, por edhe të Parlamentit të Kosovës në përgjithësi.

Se humbja është e madhe dhe fatkeqe do të duhej të kishte kurajo dhe ta thoshte edhe vetë Vetëvendosja. Se dobësimi i radhëve të organizuara të opozitës së vërtetë është dëm për Kosovën është e padiskutueshme. Se rënia e qeverisë aktuale dhe vënia prapa grilave e kryeministrit aktual është shpëtim për Kosovën, siç tha Albin Kurti me rastin e diskutimit për aprovimin e ligjit për amnisti, është po ashtu e vërtetë , por se qeveria mund të bijë vetëm përmes shtimit të radhëve organizative të opozitës së vërtetë të udhëhequr nga Vetëvendosja është po ashtu e padiskutueshme.

Atëherë Albin Kurti dhe Vetëvendosja e sidomos Visar Imeri duhet të fillojnë dhe ta rishqyrtojnë sjelljen dhe veprimin e tyre. Alma Lama ka mundur të shpëtohet. Ajo që moti ka dhënë sinjale pakënaqësie, por pakënaqësia e saj jo vetëm është injoruar, por edhe është sfiduar përmes një koketimi të pakuptimtë me zëra radikalë. Edhe koalicioni me LB-në ka mundur të shpëtohet, qoftë edhe me përmbushjen e „sakrificës” financiare të Vetëvendosjes ndaj tyre.

Edhe pritja e Grupit Parlamentar të Vetëvendosjes se deputetët e shkëputur nga koalicioni qeveritar apo zërat e brendshëm opozitarë, përfshirë kryeparlamentarin, do të shkojnë dhe do të trokasin në dyert e Vetëvendosjes siç shkohet për të kërkuar punë në një ndërmarrje, është një prepotencë e llojit të vetë. Kështu opozita e njëmendtë e organizuar në Parlamentin e Kosovës po dobësohet. Kështu pa dashje po i ndihmohet kryebosit dhe bosit të bosave, por jo Kosovës. E Kosova nuk mund të shpëtohet duke ndihmuar me apo pa dashje oligarkinë qeveritare.

Nexhmedin Gerguri, 12 korik 2013

(Mendimet e shprehura në këtë opinion nuk janë dosmosdoshmërisht qëndrime të redaksisë)