Doganës i “zhduken” 300 mijë euro

Pasi ka përvetësuar rreth 300 mijë euro, filiala e UFP-së në Pejë është mbyllur, ndërsa në arrati gjendet punëtori i kësaj filiale

Në terminalin doganor në Pejë janë “tretur si kripa në ujë” rreth 300 mijë euro nga pagesat për zhdoganimin e mallrave. Këto mjete të cilat duhet të ishin derdhur në konton e Doganave të Kosovës, i përkasin zhdoganimit të mallrave që kanë hyrë nëpërmjet pikëkalimit kufitar në Kullë, e cila lidh Kosovën me Malin e Zi.

Këto mjete, siç raporton e përditshmja “Zëri” janë paguar nga importuesit, të cilët pagesat e nevojshme ndaj Doganave i kanë bërë nëpërmjet Agjencisë për Transfere Parash, Unioni Financiar i Prishtinës (UFP), dega në Pejë. Kjo e fundit u ka lëshuar importuesve vërtetime origjinale për pagesat e kryera, ndërsa UFP asnjëherë nuk i ka bartur mjetet në vlerë prej rreth 300 mijë euro në llogari të Doganave.

Pasi ka përvetësuar rreth 300 mijë euro, filiala e UFP-së në Pejë, është mbyllur, ndërsa në arrati gjendet punëtori i kësaj filiale. Kjo ngjarje, sipas zyrtarëve të doganve ka ndodhur në fund të muajit shtator, ndërsa mungesa prej 300 mijë eurosh është vërtetuar dy javë më parë.

“Besojmë se shumë shpejt do të kemi rezultate konkrete për këtë rast nga hetimet e filluara”, ka thënë drejtori i Doganave të Kosovës, Naim Huruglica.

Përveç dëmit që i ka shkaktuar doganave, UFP ka mundur të ketë përvetësuar edhe para të tjera nga qytetarë tjerë që kanë bërë pagesa tjera të shërbimeve publike etj. UFP, sipas një njoftimi zyrtar, ofron shërbimin Union Net (Arkëtime dhe Pagesa)-Western Union (Transfertë Parash) në më se 190 agjenci në territorin e Kosovës.

Doganat e Kosovës janë arkëtuesi më i madh i Buxhetit të Kosovës. Që nga viti 2002 e deri më tani Doganat nuk kanë regjistruar raste të tilla, pavarësisht se i kanë grumbulluar në buxhetin e Kosovës mbi 4.5 miliardë euro.