Dokumente pa pagesë për personat me aftësi të kufizuara

Ministri i Punëve të Brendshme, Bajram Rexhepi mori vendim për lirim nga taksat për pajisje me dokumente personale personat me aftësi të kufizuara

Të gjithë personat me aftësi të kufizuara të kategorizuara sipas ligjit, do të lirohen nga taksat administrative për pajisje me pasaportë, letërnjoftim dhe patentë-shoferë kosovarë. Këtë venim e ka marrë të enjten, ministri i Punëve të Brendshme, Bajram Rexhepi.

Në një ceremoni, e cila u mbajt në objektin e Agjencisë së Regjistrimit Civil u shënua dhënia e dokumenteve të para për anëtarë të shoqatës “Handikos”.

Me këtë rast, ministri Rexhepi tha ky se vendim është në kuadër të politikave qeveritare për lehtësimin e jetesës për kategorinë e personave me aftësi të kufizuara.

“Vendimi i Qeverisë së Kosovës është që kjo kategori të ndihmohet në mënyrë maksimale dhe të trajtohen me ndjeshmëri. Kjo është një ndihmë modeste që t’ua lehtësojë këtyre personave kushtet e jetës, ku një numër i madh i tyre nuk kanë të ardhura ose janë të varur nga të tjetër”, tha ministri Rexhepi.

Ndërsa kryetari i shoqatës së personave më aftësi të kufizuara “Handikos”, Afrim Maliqi, tha se shpreson që një shembull i tillë të ndiqet edhe nga ministritë tjera.

“Kërkesat tona kanë qenë në vazhdimësi dhe besojmë se edhe ministritë e tjera do të marrin hapa të tilla që na lehtëson jetën tonë. Me heqjen e kësaj takse sigurisht se do të jetë më lehtë, për arsye se njerëzit me aftësi të kufizuara dhe familjet e tyre do të ndikojë të ta në lehtësim të jetës”, tha Maliqi.