Dren Feka, fitues i çmimit “Talenti i ri i futbollit” te ekipi i Hamburgut

Mbrojtësi i majtë, 18-vjeçari Dren Feka, është nderuar me çmimin e vitit si “Talenti i ri i futbollit” nga klubi i Hamburgut në Gjermani.

Gjatë afatit kalimtar të verës Valon Behrami u largua pa lënë ndonjë mbresë nga ekipi gjerman HSV Hamburg, për të kaluar në FC Watford, në premier ligën angleze.

Por një yll që duket se do të shndritë te kjo skuadër është i riu tjetër shqiptar, Dren Feka.

Djaloshi vushtrrias këto ditë nga duart e portierit legjendar të Hamburgut, Toni Schumacher, mori çmimin si “Talenti i ri i futbollit” i vitit të Hamburgut.  Pas marrjes së këtij çmimi, ai u shpreh:

“Ky është një nder i madh për mua dhe unë jam shumë i lumtur”, citon dfb.de, transmeton albinfo.ch.

Dren Feka aktivizohet për U23 të Hamburgut, ndërsa në disa ndeshje ka luajtur edhe për ekipin e parë të HSV Hamburg.