Duhet shumë punë deri te liberalizimi i vizave

Por, Kosova i ka plotësuar të gjitha kushtet për të marrë udhërrëfyesin për liberalizim të vizave

Kosova ende ka shumë punë deri te liberalizimi i vizave, ka deklaruar ministri i Punëve të Brendshme, Bajram Rexhepi.

Por sipas tij Kosova i ka plotësuar të gjitha kushtet për të marrë udhërrëfyesin për liberalizim të vizave.

Kurse, ministrja e Integrimeve Vlora Çitaku është shpreh e bindur se pas marrjes së udhërrëfyesit, nëse punohet me të njëjtën dinamikë siç është punuar deri më tash, atëherë do të përmbushen shumë shpejt edhe kriteret për liberalizim.

Në takimin me kryetarët e komunave, kryeministri Hashim Thaçi ka kërkuar nga ata që t’i përmbushin të gjitha detyrimet që dalin nga procesi i riatdhesimit.

Kurse Kjartan Bjornson, udhëheqës i Komisionit Evropian në Kosovë, ka rikujtuar zotimin e institucioneve vendëse se riintegrimi i të riatdhesuarve është prioritet kombëtar.