Duka tregon pse zgjodhën Serbinë për bashkorganizimin e U21

Gjithashtu ai zbuloi edhe arsyen pse u zgjodh Serbia

Shqipëria është një nga kandidatet kryesore për të organizuar ndeshjet finale të Kampionatit Evropian 2027 për ekipet kombëtare U-21.

Duke qenë se nuk plotësohen kushtet sa i përket numrit të stadiumeve që kërkohen, FSHF do të bashkëpunojë me Federatën Serbe të Futbollit për të pritur së bashku fazën finale të EURO 2027 për grupmoshën U-21.

Në lidhje me këtë ka folur edhe presidenti i FSHF-së, Armand Duka, i cili tha se opsioni i parë ka qenë Kosova, por ishte e parealizueshme, për shkak të infrastrukturës, transmeton albinfo.ch. Gjithashtu ai zbuloi edhe arsyen pse u zgjodh Serbia.

“Po, patjetër që opsioni i parë ka qenë Kosova. Duke qenë se Kosova nuk plotëson kriteret dhe ne gjithashtu nuk i plotësojmë për ta organizuar vetëm, atëherë ne pamë aplikuesit që ishin: Shqipëria, Serbia, Turqia dhe Belgjika. Dy të tjerët nuk kishin interes të bashkoheshin me ne. Kandidati i vetëm mbetej Serbia. Ne kemi interesa, sepse organizojmë një event madhor në Shqipëri dhe ekipi ynë kualifikohet automatikisht në Euro 2027”, deklaroi Duka për “Express”.

 

---