E premtja shpallet ditë zie shtetërore në Kosovë për Rexhep Qosjen

Albulena Haxhiu: Nderim për jetën dhe veprën e akademikut që i dha kulturës shqiptare dije dhe autoritet

Ushtruesja e detyrës së presidentes së Kosovës, Albulena Haxhiu, ka njoftuar se dita e nesërme (e premte) është shpallur ditë zie shtetërore në nderim të jetës dhe veprës së akademikut Rexhep Qosja, përcjell albinfo.ch.

Haxhiu ka thënë se ky vendim vjen si shenjë respekti dhe mirënjohjeje institucionale për kontributin e Qosjes në kulturën dhe mendimin shqiptar.

“Me këtë vendim, shteti ynë shpreh nderimin dhe mirënjohjen për një personalitet që i dha kulturës shqiptare dije, vepër dhe autoritet”, ka shkruar ajo.

Akademiku Rexhep Qosja ka ndërruar jetë sot në moshën 89-vjeçare, duke lënë pas një trashëgimi të rëndësishme në fushën e letërsisë, kritikës dhe studimeve shqiptare. /Albinfo.ch

---